“គាត់ឥឡូវប្លែកម្លេះ? គាត់ខុសពីមុនខ្លាំងណាស់។ កាលពីមុនគាត់មិនងាយខឹង មិនឆេវឆាវចឹងទេ?”
ទាំងនេះគឺជាពាក្យដែលអ្នកអាចនិយាយខ្លួនឯងផ្ទាល់ ឬក៏អ្នកដទៃនិយាយពីអ្នក។ ជាញឹកញយណាស់ដែលយើងតែងតែគិតថា អ្នកដទៃប្លែកខុសពីមុន ហើយយើងមិនដែលគិតថា ខ្លួនឯងប្លែកនោះឡើយ។ ពាក្យថាប្លែកមានន័យថា ខុសពីអ្វីដែលយើងធ្លាប់បានឃើញធ្លាប់បានស្គាល់។ តែយើងប្រហែលជាបានភ្លេចនូវច្បាប់ធម្មជាតិមួយដែលថា៖ គ្រប់យ៉ាងតែងតែប្រែប្រួល។ គាត់ប្រែប្រួល យើងក៏ប្រែប្រួល គ្រប់គ្នាគឺសុទ្ធតែប្រែប្រួល។ ការប្រែប្រួលនៅក្នុងរឿងមួយនេះមានដូចជា៖
- ការលើកដាក់សម្លេងរបស់យើងកាលពីមុន ខុសពីឥឡូវនេះ ដូច្នេះហើយ ពាក្យដដែលដែលយើងនិយាយ ក៏អាចធ្វើឲ្យទទួលបានអារម្មណ៍ផ្សេងគ្នាបានដែរ។
- ទំនាក់ទំនងយើង និងគាត់កាលពីមុន ប្រហែលខុសពីឥឡូវនេះ (អាចស្និទ្ធស្នាល ឬឃ្លាតឆ្ងាយជាងមុន)
- ទំនួលខុសត្រូវរបស់គាត់កាលពីមុន ប្រហែលជាតិចជាងឥឡូវនេះ។
- គាត់កាលពីមុនប្រហែលមានសុខភាពល្អជាងឥឡូវនេះ (ទាំងផ្លូវកាយ និងផ្លូវចិត្ត)
ដូច្នេះ ភាពប្លែករបស់ពួកយើង គឺជារឿងធម្មតាទេនៅក្នុងដំណើរជីវិតមួយនេះ។ បើយើងកំពុងខកចិត្តនឹងនរណាម្នាក់ដោយសារយល់ថាគាត់ប្លែកជាងពីមុននោះ អ្វីដែលយើងគួរធ្វើ គឺត្រូវព្រមទទួលយកច្បាប់ធម្មជាតិនៃការប្រែប្រួលនេះ ហើយគួរតែស្វែងយល់ពីគាត់ ថាតើភាពប្លែករបស់គាត់នេះមកពីអ្វី? មកពីទំនួលខុសត្រូវរបស់គាត់ច្រើនជាងមុន មកពីសុខភាពផ្លូវចិត្តរបស់គាត់កំពុងចុះខ្សោយ ឬមួយគាត់កំពុងជួបបញ្ហាផ្ទួនៗគ្នាច្រើនជាងមុន? ហើយបើដូចនេះ តើអ្នកគួរតែអន់ចិត្តនឹងគាត់ ខឹងគាត់ ឬក៏គួរតែអាណិតគាត់។
ដោយក្តីស្រលាញ់ពី AromToday ♥️
#៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ
