Thoughts

241 / 365 នៃមេរៀនជីវិតរីករាយ

ការវិនិយោគដែលបានផលចំណេញច្រើនហើយមិនអាចខាត គឺការវិនិយោគលើសន្តិភាពផ្លូវចិត្តរបស់អ្នក។ ចិត្តដែលមានសន្តិភាព គឺជាចិត្តដែលគ្មានសង្គ្រាមជាមួយខ្លួនឯងនិងអ្នកដទៃ។ វាគឺជាចិត្តដែលនឹងនរ ដែលស្ងប់មិនតក់ស្លត់នឹងរឿងរ៉ាវទាំងឡាយដែលកើតឡើង ដែលនេះជាហេតុធ្វើឱ្យអ្នកដែលមានសន្តិភាពផ្លូវចិត្តមានសេចក្តីសុខច្រើននៅក្នុងការរស់នៅប្រចាំថ្ងៃនិងមានប្រសិទ្ធភាពការងារខ្ពស់។ គ្រប់ការវិនិយោគគឺតែងតែត្រូវការទុន ហើយទុនសម្រាប់សន្តិភាពផ្លូវចិត្តរបស់អ្នកអាចមានច្រើនប្រភេទណាស់ដូចជា ការចេះអភ័យទោសឱ្យ ការចេះដឹងគុណនិងអរគុណចំពោះរឿងគ្រប់យ៉ាងដែលកើតឡើងចំពោះអ្នក ការទទួលយកការពិត សេចក្តីមេត្តា ការរស់នៅដោយសីលជាដើម។ ពេលស្តាប់ទៅវាហាក់ដូចជាច្រើនណាស់ តែវាក៏គ្មានហេតុផលណាដែលមិនគួរវិនិយោគទៅលើរឿងដ៏សែនចំណេញមួយនេះដែរ។ ដោយក្តីស្រលាញ់ពី AromToday ♥️ #៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ

240 / 365 នៃមេរៀនជីវិតរីករាយ

នៅក្នុងសង្គមមួយចំនួនជាពិសេសនៅអាស៊ីយើង អាយុ៣០ ៤០ឆ្នាំ វាចាប់ផ្តើមជាវ័យចាស់មួយហើយ ខណៈដែលវ័យនេះគឺជាវ័យមួយល្អមែនទែន ព្រោះវាពោរពេញទៅដោយកម្លាំង ចំណេះដឹង និងបទពិសោធជាច្រើន។ ដោយសារតែផ្នត់គំនិត"យើងចាស់ហើយ" យើងក៏ចាប់ផ្តើមឈប់ប្រើប្រាស់ថាមពលដែលយើងធ្លាប់ប្រើកាលពីក្មេង។ អ្នកដឹងទេ ទោះអ្នកកំពុងមានអាយុ៥០ឆ្នាំ ឬស្ថិតនៅវ័យណាមួយនៃជីវិតក៏ដោយ ក៏អ្នកអាចយកថាមពលក្មេងៗរបស់អ្នកមកប្រើប្រាស់បានដែរ។ សូមអ្នកកុំច្រលំវាជាមួយ“ចាស់ព្រើល”។ ចុះតើថាមពលក្មេងៗជាអ្វី? វាជាថាមពលដែលធ្វើឱ្យអ្នកអាចរីករាយដោយមិនខ្វល់ពីការគិតរបស់អ្នកដទៃមកលើអ្នក ជាថាមពលមួយដែលធ្វើឱ្យអ្នកពោរពេញទៅដោយភាពចង់ចេះចង់ដឹងចង់រៀនចង់អភិវឌ្ឍ ជាថាមពលដែលអាចឱ្យអ្នកផ្តោតលើអ្វីដែលអ្នកចង់បានជាជាងឧបសគ្គដែលអ្នកនឹងត្រូវឆ្លងកាត់ ហើយក៏ជាថាមពលដែលធ្វើឱ្យអ្នកផ្តោតទៅលើខណៈនីមួយៗដែលអ្នកកំពុងរស់នៅផងដែរ។ អ្នកធ្លាប់ប្រើប្រាស់ថាមពលក្មេងមួយនេះ ហើយអ្នកក៏នៅតែអាចបន្តប្រើប្រាស់វាតទៅទៀតបានដែរ។ ចូរអនុញ្ញាតឱ្យថាមពលក្មេងមួយនេះបន្តនៅជាមួយអ្នករហូតទៅ មិនខ្វល់ថាអ្នកកំពុងស្ថិតនៅក្នុងវ័យណាមួយនោះទេ។ ដោយក្តីស្រលាញ់ពី AromToday ♥️ #៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ

239 / 365 នៃមេរៀនជីវិតរីករាយ

អ្នកមិនអាចបញ្ឈប់អ្នកដទៃកុំឱ្យវាយតម្លៃមកលើអ្នកបាននោះឡើយ តែអ្នកត្រូវចាំថា តម្លៃរបស់អ្នកក៏មិនធ្លាក់ចុះឬប្រែប្រួលទៅតាមពាក្យសម្តីនិងការយល់ឃើញរបស់ពួកគាត់ដែរ។ ហើយបើអ្នកខឹងឬអន់ចិត្តដែលពួកគាត់វាយតម្លៃអ្នក ចូរអ្នកគិតដល់ហេតុផលពីរយ៉ាងនេះ។ ហេតុផលទី១៖ គាត់ឱ្យតម្លៃអ្នកទៅតាមសមត្ថភាពរបស់គាត់តែប៉ុណ្ណោះ វាដូចជាអ្នកទិញដែលមានប្រាក់តិចតួចព្យាយាមបន្ទាបតម្លៃអ្វីដែលគាត់ចង់បាន។ ហេតុផលទី២៖ គាត់ឱ្យតម្លៃអ្នកទៅតាមអ្វីដែលជាគាត់ វាដូចសត្វមាន់នឹងជ្រើសរើសយកគ្រាប់ស្រូវជាជាងដុំពេជ្យមួយដុំដូច្នោះដែរ។ ដូច្នេះ ចូរអ្នកបន្តអភិវឌ្ឍ បន្តរស់នៅជាខ្លួន និងបន្តធ្វើល្អតទៅទៀត ព្រោះទង្វើទាំងអស់នេះហើយដែលធ្វើឱ្យអ្នកកាន់តែមានតម្លៃ។ ដោយក្តីស្រលាញ់ពី AromToday ♥️ #៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ

238 / 365 នៃមេរៀនជីវិតរីករាយ

បើអ្នកជាមនុស្សពូកែសង្កេត អ្នកនឹងមិនពិបាកចិត្តយូរនោះទេ ព្រោះអ្វីអ្នកដឹងទេ? ព្រោះអ្នកនឹងឃើញថា គ្មានបញ្ហាណាអាចនៅជាមួយអ្នករហូតនោះឡើយ ហើយបញ្ហានីមួយៗដែលចូលមកក្នុងជីវិតអ្នកមានគោលដៅតែមួយគត់ គឺវាមកធ្វើឱ្យអ្នកកាន់តែរឹងមាំឡើងៗពីមួយថ្ងៃទៅមួយថ្ងៃ។ បើអ្នកមិនជឿ អ្នកអាចធ្វើការឆ្លុះបញ្ចាំងពីមេរៀន និងភាពរឹងមាំដែលអ្នកទទួលបានពីបញ្ហាដែលកើតឡើងលើអ្នកទៅមើល។ ដោយក្តីស្រលាញ់ពី AromToday ♥️ #៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ

237 / 365 នៃមេរៀនជីវិតរីករាយ

អ្នកច្បាស់ជាធ្លាប់និយាយសរសើរអ្នកណាម្នាក់ថាពូកែ ស្អាត ប្រឹងប្រែងតស៊ូជាដើម។ តើមកដល់ពេលនេះ អ្នកធ្លាប់និយាយសរសើរខ្លួនឯងហើយឬនៅ? ដឹងទេ "អ្នក" ក៏ជាមនុស្សម្នាក់ដែលអ្នកត្រូវសរសើរនិងឱ្យតម្លៃដែរ។ ទំរាំដើរមកដល់ចំនុចនេះនៃជីវិត តើអ្នកពូកែយ៉ាងណា តស៊ូប្រឹងប្រែងយ៉ាងណា? វាល្អណាស់ដែលអ្នកអាចមើលឃើញពីចំនុចល្អនិងចំនុចវិជ្ជមានរបស់អ្នកដទៃ ហើយវារឹតតែល្អមែនទែន ដែលអ្នកអាចមើលឃើញពីចំនុចវិជ្ជមានរបស់ខ្លួនឯង ហើយនិយាយសរសើរខ្លួនឯងជារឿយៗនោះ។ ដោយក្តីស្រលាញ់ពី AromToday ♥️ #៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ

236 / 365 នៃមេរៀនជីវិតរីករាយ

ការអភ័យទោសឱ្យអ្នកដទៃ គឺជាកាដូដែលអ្នកឱ្យមកខ្លួនឯង ហើយការឱ្យនេះ ក៏មិនចាំបាច់ត្រូវសូមការអនុញ្ញាតពីគាត់ដែរ។ នេះមានន័យថា អ្នកមិនចាំបាច់រង់ចាំការសូមអភ័យទោសពីគាត់ ទើបអ្នកអាចអភ័យទោសឱ្យពួកគាត់នោះទេ។ អ្នកដឹងទេ គាត់ប្រហែលគ្មានភាពរឹងមាំគ្រប់គ្រាន់ក្នុងការប្រឈមមុខនឹងអ្នកក្នុងការសូមទោសឡើយ។ ហើយរឿងដែលគួរឱ្យអាណិតជាងនេះទៅទៀតនោះគឺ ពេលខ្លះគាត់មិនទាំងដឹងថាគាត់ធ្វើខុសទៅទៀត។ នេះវាគឺជាកំសោយរបស់គាត់ តែអ្នកពិតជាខ្លាំងគ្រប់គ្រាន់ដែលអាចអនុញ្ញាតឱ្យខ្លួនឯងអាចអភ័យទោសឱ្យពួកគាត់។ ដោយក្តីស្រលាញ់ពី AromToday ♥️ #៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ

235 / 365 នៃមេរៀនជីវិតរីករាយ

អ្នកគឺជាអ្នកដំណើរម្នាក់ដែលត្រូវដើរផ្លូវជីវិតរបស់អ្នក។ ដើម្បីឱ្យដំណើររបស់អ្នកងាយស្រួល និងរីករាយបានច្រើន អ្នកត្រូវយកតាមខ្លួនតែរបស់ណាដែលចាំបាច់សម្រាប់ដំណើរមួយនេះតែប៉ុណ្ណោះ។ អ្នកក៏ត្រូវចេះទម្លាក់ចោលរបស់ដែលលែងចាំបាច់ បើមិនដូច្នេះទេ អ្នកនឹងគ្មានកន្លែងសម្រាប់ដាក់របស់ដែលអ្នកពិតជាត្រូវការនោះឡើយ។ ដូចគ្នាដែរ អ្នកអាចទម្លាក់ចោលរាល់ការគិតទាំងឡាយណាដែលមិនចាំបាច់សម្រាប់ដំណើររបស់អ្នក ហើយជ្រើសយកការគិតណាដែលជួយអ្នកឱ្យរីករាយជាមួយដំណើរមួយនេះចុះ។ ដោយក្តីស្រលាញ់ពី AromToday ♥️ #៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ

234 / 365 នៃមេរៀនជីវិតរីករាយ

រឿងដែលពិបាកបំផុតក្នុងការសម្រេចគោលដៅណាមួយនៅក្នុងជីវិតគឺមិនមែនជាវិន័យ ឬការធ្វើសកម្មភាពឆ្ពោះទៅរកគោលដៅនោះទេ តែគឺជាការគ្រប់គ្រងចិត្តមួយដែលចង់ទៅដល់គោលដៅលឿនពេក។ ចិត្តម្នាក់ៗតែងតែបែបនេះ តែអ្នកពិតជាអាចបង្វឹកឱ្យវាចេះអត់ធ្មត់បាន។ អ្នកអាចរំលឹកខ្លួនឯងជារឿយៗថា ផ្លែផ្កានៃដើមឈើមួយដើមនេះមិនអាចកើតឡើងនៅក្នុងថ្ងៃដែលខ្ញុំទើបតែដាំវានោះទេ។ ដោយក្តីស្រលាញ់ពី AromToday ♥️ #៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ

233 / 365 នៃមេរៀនជីវិតរីករាយ

មានមតិមួយបានលើកឡើងថា៖ “សម្រេចគោលដៅរបស់អ្នកដោយស្ងៀមស្ងាត់ កុំប្រាប់អ្នកដទៃ។” មនុស្សផ្សេងគ្នា ការយល់ឃើញក៏ផ្សេងគ្នាដែរ។ អ្នកខ្លះក៏បកស្រាយថា ព្រោះពេលអ្នកប្រាប់អ្នកដទៃ គេនឹងច្រណែនអ្នក នឹងបង្អាក់អ្នកពីការធ្វើការងារមួយនោះ។ ឯអ្នកខ្លះទៀតបានលើកឡើងថា កាលណាអ្នកប្រាប់គេ អ្នកចំណាយពេលនិយាយច្រើនជាងធ្វើ ហើយក៏មិនមានហេតុផលអ្វីដែលអ្នកគួរប្រាប់គេដែរ។ ការបកស្រាយអាចមានច្រើនទៅតាមហេតុផលរៀងៗខ្លួន តែបើអ្នកសង្កេតបន្តិចអ្នកនឹងឃើញថា ទោះមតិច្រើនយ៉ាងណាក៏ដោយ ក៏មានមនុស្សតែពីរក្រុមប៉ុណ្ណោះដែលផ្តល់មតិទាំងនេះ។ ក្រុមទីមួយ គឺជាមនុស្សដែលផ្តោតទៅលើកត្តាខាងក្រៅច្រើនជាងខ្លួនឯង។ ក្រុមនេះតែងរកវិធីទប់ស្កាត់កត្តាខាងក្រៅ ហើយផ្តោតទៅលើកត្តាខាងក្រៅច្រើន។ ថាមពលរបស់គាត់ភាគច្រើនចំណាយទៅលើរឿងខាងក្រៅខ្លួន។ យើងអាចមើលឃើញពីឧទាហរណ៍ខាងលើគឺ គាត់មិនប្រាប់គេព្រោះខ្លាចគេច្រណែនគាត់ បង្អាក់គាត់ពីអ្វីដែលគាត់ចង់ធ្វើជាដើម។ឯក្រុមទីពីរ គឺផ្តោតទៅលើខ្លួនឯងទាំងស្រុង។ ក្រុមនេះមិនខ្វល់ពីកត្តាខាងក្រៅនោះទេ ហើយផ្តោតច្រើនទៅលើខ្លួនឯង និងអ្វីដែលគាត់អាចធ្វើបាន អាចគ្រប់គ្រងបាន។...

232 / 365 នៃមេរៀនជីវិតរីករាយ

ខ្ញុំជឿថា គ្រប់គ្នាគឺសុទ្ធតែធ្លាប់ទទួលបានការបដិសេធនៅក្នុងជីវិត។ វាអាចជាការបដិសេធឬបញ្ឈប់ពីឱកាសការងារឬឱកាសផ្សេងៗទៀត ឬពីមនុស្សដែលអ្នកស្រលាញ់ជាដើម។ អ្នកអាចមានអារម្មណ៍ឈឺចាប់ ខកចិត្ត និងខឹងចំពោះការបដិសេធទាំងនោះ។ តែបើអ្នកសង្កេតបន្តិចអ្នកនឹងឃើញថា តាមពិតការបដិសេធទាំងនេះគ្រាន់តែជាសញ្ញាប្រាប់អ្នកថា អ្នកបានដើរមកដល់ផ្លូវបត់ហើយ ហើយតម្រូវឱ្យអ្នកត្រូវដើរតាមផ្លូវថ្មីមួយផ្សេងទៀត ដែលផ្លូវថ្មីនេះនឹងនាំអ្នកឆ្ពោះទៅរករឿងដែលអស្ចារ្យមួយនៅខាងមុខ។ ដូច្នេះអ្វីដែលអ្នកគួរធ្វើគឺអរគុណចំពោះសញ្ញានេះ ហើយបន្តដើរទៅមុខទៀត ដើររហូតទាល់តែអ្នកបានជួបរឿងអស្ចារ្យមួយនោះ។ ដោយក្តីស្រលាញ់ពី AromToday ♥️ #៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ