ធម្មជាតិពិតជាបានផ្តល់ភាពអស្ចារ្យដល់អ្នកក្នុងការសម្របខ្លួនដើម្បីអាចរស់នៅជីវិតមួយនេះ ជាពិសេសពេលដែលអ្នកកំពុងជួបការលំបាកនិងឧបសគ្គនានា។ ខ្ញុំនឹងលើកយករឿងតូចមួយមកពិសោធ នោះគឺភាពងងឹត។ អ្នកអាចជាមនុស្សខ្លាចងងឹតខ្លាំង ព្រោះអ្នកធ្លាប់ឆ្លងកាត់បទពិសោធអាក្រក់មួយនៅពេលងងឹត។ អ្នកក៏ប្រហែលជាមនុស្សខ្លាចងងឹតតិចៗដែរ ព្រោះពេលងងឹតអ្នកមើលអីមិនឃើញ។ ឬមួយអ្នកអាចជាមនុស្សដែលមានចិត្តនឹងនរមិនខ្លាចងងឹតសោះ។ មិនថាបទពិសោធអ្នកយ៉ាងណាចំពោះភាពងងឹតនោះទេ អ្វីដែលខ្ញុំចង់ឲ្យអ្នកពិសោធនោះគឺ តើមានអ្វីកើតឡើងនៅពេលងងឹត? តោះសាកល្បងពិសោធមើលទាំងអស់គ្នា។
យប់នេះពេលអ្នកគេង បិទភ្លើងទាំងអស់នៅក្នុងបន្ទប់របស់អ្នកតែកុំទាន់បិទភ្នែក (សម្រួលអារម្មណ៍បើអ្នកខ្លាចងងឹតខ្លាំង ហើយមិនអាចគេងដោយបិទភ្លើងបាន)។ បន្ទាប់មកទៀតនៅស្ងៀម២ទៅ៣នាទី ពេលនោះអ្នកនឹងសង្កេតឃើញថាខ្លួនឯងនឹងចាប់ផ្តើមអាចមើលឃើញនៅក្នុងភាពងងឹតនោះ ហើយវាមិនងងឹតខ្លាំងដូចជាពេលដែលអ្នកបិទភ្លើងពីដំបូងនោះទេ។ តើមានអ្វីកើតឡើង? នៅពេលងងឹត ប្រស្រីភ្នែកខ្មៅរបស់អ្នកនឹងរីកធំជាងមុនដើម្បីឲ្យអ្នកអាចមើលឃើញសូម្បីតែពន្លឺដ៏តិចតួចមែនទែន។ ធម្មជាតិនៃប្រស្រីភ្នែករបស់យើងអាចរីកឬរួមទៅតាមស្ថានភាពដែលយើងកំពុងជួបប្រទះដើម្បីជួយយើង ដូចជាពេលងងឹត ភ្លឺខ្លាំង សប្បាយចិត្ត ឬពេលជួបគ្រោះថ្នាក់ជាដើម។ ជាទូទៅភ្នែករបស់យើងតែងតែត្រូវការពេលក្នុងការសម្របខ្លួន ឧទាហរណ៍ពីភ្លឺទៅងងឹត (dark adaptation)។ នេះជាការពិតមួយដែលអ្នកវិទ្យាសាស្រ្តបានរកឃើញ។
ចុះតើខ្ញុំលើកវាមកបកស្រាយធ្វើអ្វី? អ្វីដែលខ្ញុំចង់និយាយនោះគឺ ការរស់នៅជីវិតអ្នកក៏ដូចគ្នា។ អ្នកអាចធ្លាប់ឆ្លងកាត់បញ្ហានៅក្នុងជីវិតរហូតដល់អ្នកបាក់ស្បាត ឬអ្នកអាចជួបបញ្ហាភ្លាមភ័យភ្លាម តែភ័យមិនយូរទេ រួចហើយអ្នកក៏បន្សាំខ្លួនឯងជាមួយបញ្ហានោះ បន្ទាប់មកព្យាយាមរកដំណោះស្រាយសម្រាប់វា។ ពេលអ្នករៀនបន្សាំខ្លួនយូរៗទៅ អ្នកនឹងយល់ច្បាស់ពីដំណើរនៃការជួបបញ្ហាក្នុងជីវិត និងដំណើរនៃការដោះស្រាយវាជាមិនខាន ហើយពេលនោះ អ្នកនឹងមិនតក់ស្លត់ពេលជួបបញ្ហាទាំងអស់នោះទៀតទេ។ តែបើខណៈណាដែលអ្នកពិបាកសម្របខ្លួននឹងវា អ្នកក៏ត្រូវប្រាប់ខ្លួនឯងថា៖ “ធម្មជាតិបានឲ្យសមត្ថភាពដ៏អស្ចារ្យមកខ្ញុំក្នុងការសម្របខ្លួននឹងស្ថានភាពផ្សេងៗ ហើយផ្នែកជាច្រើននៃរាងកាយរបស់ខ្ញុំក៏បានប្រើប្រាស់សមត្ថភាពពិសេសមួយនោះហើយ ចុះមានរឿងអ្វីដែលចិត្តខ្ញុំមិនអាចធ្វើបាននោះ?”
ដូច្នេះហើយ គ្រប់ពេលដែលអ្នកជួបបញ្ហាហើយអ្នកខ្លាចវានោះ កុំភ្លេចទុកពេលឲ្យខ្លួនឯងរៀនសម្របខ្លួនជាមួយវា ហើយបន្ទាប់មកទៀត អ្នកនឹងអាចដឹងពីអ្វីដែលត្រូវធ្វើជាមិនខាន។
ដោយក្តីស្រលាញ់ពី AromToday ♥️
#៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ
