ក្មេងតូចអាយុ៧ឆ្នាំម្នាក់បានមើលវីដេអូព្យុះសូណាមិនៅជប៉ុន ហើយក៏ប្រាប់ទៅប៉ាខ្លួនថាមិនចង់ទៅជប៉ុនទេព្រោះព្យុះសាហាវណាស់។ ដោយសារតែក្មេងតូចចូលចិត្តមើលវីដេអូបែបហ្នឹង ទើបគាត់មិនដែលចង់ទៅណានោះទេ។ ពិតជាគួរឲ្យអាណិតក្មេងតូចកំសត់ណាស់ ដែលត្រូវបានខ្មោចទូរសព្ទ័ធ្វើឲ្យគាត់យល់ថាពិភលលោកទាំងមូលគួរឲ្យខ្លាច។
ខ្ញុំជាមនុស្សធំអាចពិចារណាបាន ទើបខ្ញុំយល់ថាពិភពលោកគឺពិតជាស្រស់ស្អាតណាស់។ តែក៏មានមនុស្សធំខ្លះបដិសេធការយល់ឃើញនេះដែរ។ ពួកគេយល់ថា ពិភពលោកពោរពេញទៅដោយមនុស្សអាក្រក់ច្រើនណាស់ វាមិនស្រស់ស្អាតទេ ដូច្នេះហើយកុំទុកចិត្តអ្នកណាឲ្យសោះ។ ឯអ្នកខ្លះទៀតក៏ធ្លាប់យល់ថាពិភពលោកស្រស់ស្អាតដែរ តែដោយសារខ្លួនជួបការបោកប្រាស់ ឬខកចិត្តច្រើនដងពេក ពួកគាត់ក៏យល់ថាពិភពលោកមិនស្រស់ស្អាតដូចអ្វីដែលខ្លួនធ្លាប់បានគិតកន្លងមកទេ។
អាក្រក់ឬល្អវាអាស្រ័យទៅតាមការយល់ឃើញរបស់មនុស្សម្នាក់ៗ។ តែទោះបីជាខ្ញុំធ្លាប់ត្រូវបានគេបោក គេកុហក កេងប្រវ័ញ្ច ឬជួបរឿងមិនល្អផ្សេងៗទៀតក៏ដោយ ក៏ខ្ញុំនៅតែយល់ថាពិភពលោកគឺស្រស់ស្អាតដដែល ព្រោះខ្ញុំយល់ពីធម្មជាតិរបស់មនុស្សដែលមានចិត្តមិនទាន់បានអប់រំដល់កំរិត គឺតែងតែអាចកុហក កេងប្រវ័ញ្ច ឬធ្វើរឿងណាមួយដែលមិនត្រឹមត្រូវបាន។ ដូច្នេះហើយ តើខ្ញុំទៅខឹងនឹងការពិតមួយនេះបានប្រយោជន៍អ្វី? អ្វីដែលខ្ញុំអាចធ្វើបានគឺរៀនសូត្រពីមេរៀនទាំងនោះ ហើយក៏ប្រើប្រាស់វាដើម្បីការពារខ្លួនទៅថ្ងៃក្រោយ។ បើយើងយល់ថាពិភពលោកគួរឲ្យខ្លាច យើងនឹងមិនអាចរស់នៅជីវិតមួយនេះឲ្យប្រសើរបានឡើយ តែបើយើងយល់ថាវាស្រស់ស្អាត និងចេះរស់នៅដោយការប្រុងប្រយ័ត្នតាមការគួរ នោះយើងនឹងរីករាយរស់នៅជីវិតមួយនេះជាមិនខាន យើងនឹងមិនរស់នៅដូចក្មេងតូចដែលបានរៀបរាប់ខាងលើនោះទេ។
ដោយក្តីស្រលាញ់ពី AromToday ♥️
#៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ
