មានមតិមួយបានលើកឡើងថា៖ “សម្រេចគោលដៅរបស់អ្នកដោយស្ងៀមស្ងាត់ កុំប្រាប់អ្នកដទៃ។” មនុស្សផ្សេងគ្នា ការយល់ឃើញក៏ផ្សេងគ្នាដែរ។ អ្នកខ្លះក៏បកស្រាយថា ព្រោះពេលអ្នកប្រាប់អ្នកដទៃ គេនឹងច្រណែនអ្នក នឹងបង្អាក់អ្នកពីការធ្វើការងារមួយនោះ។ ឯអ្នកខ្លះទៀតបានលើកឡើងថា កាលណាអ្នកប្រាប់គេ អ្នកចំណាយពេលនិយាយច្រើនជាងធ្វើ ហើយក៏មិនមានហេតុផលអ្វីដែលអ្នកគួរប្រាប់គេដែរ។ ការបកស្រាយអាចមានច្រើនទៅតាមហេតុផលរៀងៗខ្លួន តែបើអ្នកសង្កេតបន្តិចអ្នកនឹងឃើញថា ទោះមតិច្រើនយ៉ាងណាក៏ដោយ ក៏មានមនុស្សតែពីរក្រុមប៉ុណ្ណោះដែលផ្តល់មតិទាំងនេះ។
ក្រុមទីមួយ គឺជាមនុស្សដែលផ្តោតទៅលើកត្តាខាងក្រៅច្រើនជាងខ្លួនឯង។ ក្រុមនេះតែងរកវិធីទប់ស្កាត់កត្តាខាងក្រៅ ហើយផ្តោតទៅលើកត្តាខាងក្រៅច្រើន។ ថាមពលរបស់គាត់ភាគច្រើនចំណាយទៅលើរឿងខាងក្រៅខ្លួន។ យើងអាចមើលឃើញពីឧទាហរណ៍ខាងលើគឺ គាត់មិនប្រាប់គេព្រោះខ្លាចគេច្រណែនគាត់ បង្អាក់គាត់ពីអ្វីដែលគាត់ចង់ធ្វើជាដើម។
ឯក្រុមទីពីរ គឺផ្តោតទៅលើខ្លួនឯងទាំងស្រុង។ ក្រុមនេះមិនខ្វល់ពីកត្តាខាងក្រៅនោះទេ ហើយផ្តោតច្រើនទៅលើខ្លួនឯង និងអ្វីដែលគាត់អាចធ្វើបាន អាចគ្រប់គ្រងបាន។ ក្រុមនេះចំណាយថាមពលទាំងស្រុងរបស់គាត់មកលើខ្លួនឯងក្នុងការធ្វើការងារណាមួយ។ ហើយក្រុមនេះអាចរកឃើញច្រើនជាក្រុមអ្នកជោគជ័យ ឬទស្សនវិទូ។
ហើយអ្នកដឹងទេ ក្រុមមនុស្សដែលរីករាយច្រើនក៏ជាក្រុមដែលផ្តោតថាមពលរបស់គាត់ទាំងស្រុងមកលើខ្លួនឯងដែរ។ ពួកគាត់យល់ថា គ្មាននរណាអាចគ្រប់គ្រងកត្តាខាងក្រៅបានឡើយ តែយើងពិតជាអាចគ្រប់គ្រងខ្លួនឯងបានក្នុងការឆ្លើយតបទៅនឹងកត្តាទាំងនោះ។ ចុះតើអ្នកជ្រើសរើសធ្វើជាមនុស្សក្រុមមួយណា?
ដោយក្តីស្រលាញ់ពី AromToday ♥️
#៣៦៥ថ្ងៃនៃមេរៀនជីវិតរីករាយ #ដុះជាមួយខ្ញុំ
